Kryetari i sapozgjedhur i komunës së Mitrovicës së Veriut, Erden Atiq, i cili sot u betua si kryetar i kësaj komune, tha se do të punojë për të gjithë qytetarët pa dallim.
Ai u ka bërë ftesë qytetarëve që ta vizitojnë komunën e Mitrovicës së Veriut, për ta shtuar bashkëpunimin.
Angazhimi më i madh, sipas tij, do të jetë normalizimi situatës në këtë komunë.
“Jam i kënaqur, sapo e përfunduam seancën solemne të betimit. Me gjithë ekipin shprehi se do të punojmë për të gjithë qytetarët e komunës veriore të Mitrovicës, pa dallim. Angazhimin më të madh do ta bëjmë për ta normalizuar këtë pjesë të komunës, i bëj ftesë gjithë qytetarëve që të vijnë dhe të na takojnë dhe të bashkëpunojmë sa më mirë për të mirën e qytetarëve. Së bashku jam me nënkryetaren Katarina Hagangjiq, do të punojmë me një ekip shpresëdhënëse. Me neve është ministri Elbert Krasniqi, po ashtu është kryesuesi i kuvendit, Nexhat Uglani”, ka thënë ai.
I pyetur se kur do të hapet Ura e Ibrit, Atiq nuk u përgjigj drejtpërdrejt, por vetëm tha se komuna nën udhëheqjen e tij ka për qëllim lehtësimin e jetës së qytetarëve dhe heqjen e pengesave.
“Ne si ekzekutiv qëllimin e kemi për ta lehtësuar jetën qytetarëve, çfarëdo pengese që kanë në këtë aspekt, angazhimin e kemi që t’i rregullojmë problemet”, ka thënë ai.
Erden Atiq, i cili i fitoi zgjedhjet e jashtëzakonshme në Mitrovicën e Veriut, e ka dhënë betimin si kryetar i ri i kësaj komune.
Po ashtu, ai e ka caktuar edhe nënkryetaren e re të komunës, Katarina Agangjigj.