I dërguari i posaçëm i Bashkimit Evropian për dialogun Kosovë – Serbi, Miroslav Lajçak, pas takimit me presidenten e Kosovës, Vjosa Osmani, në orët e paradites të së martës, ku i pranishëm ishte edhe i dërguari i ShBA-së për Ballkanin Perëndimor, Gabriel Escobar, ka thënë se kryetemë në këtë takim ishte situata në veri.
Emisari Lajçak, përmes një postimi në Twitter, ka thënë se në këtë takim u theksua rëndësia e gjetjes së një zgjidhjeje politike që mundëson depërshkallëzimin e situatës dhe kthimin në normalitet.
“Sot në mëngjes me presidenten e Kosovës, Vjosa Osmani, kemi diskutuar për situatën në veri të Kosovës. Ne theksuam rëndësinë e gjetjes së një zgjidhjeje politike që mundëson depërshkallëzimin e menjëhershëm dhe kthimin në normalitet”, ka shkruar Lajçak.
This morning, we discussed the situation in the north of Kosovo with President @VjosaOsmaniPRKS.
We stressed the importance to find a political solution allowing for immediate de-escalation and return to normalisation. pic.twitter.com/FeIQYa8bkQ— Miroslav Lajčák (@MiroslavLajcak) June 6, 2023
Ndryshe, të martën, presidentja e Kosovës, Vjosa Osmani, priti në takim përfaqësuesin special të Shteteve të Bashkuara të Amerikës për Ballkanin Perëndimor, Gabriel Escobar dhe përfaqësuesin special të BE-së për Dialog, Miroslav Lajçak.
Ndërkaq, në njoftimin e Zyrës së presidentes thuhet se në takim Osmani ka shprehur përkushtimin e plotë që të punohet së bashku me partnerët ndërkombëtarë, në mënyrë që në veri të vendit të sundojë rendi e ligji dhe të ruhet sovraniteti i Republikës së Kosovës.
“Sipas presidentes Osmani, ndëshkimi i grupeve kriminale dhe individëve që përdorën dhunë ndaj policisë, gazetarëve, pjesëtarëve të KFOR-it, EULEX-it dhe qytetarëve, është rruga e vetme për stabilitet të qëndrueshëm dhe afatgjatë. Prandaj, theksoi ajo, presim që institucionet ligjzbatuese ta bëjnë punën e tyre në përputhje me ligjin, në mënyrë që grupet kriminale përgjegjëse për dhunën të përballen me drejtësinë”, thuhet në njoftim.
Presidentja Osmani ka potencuar se zgjedhjet e reja në komunat në veri të vendit mund të organizohen në përputhje me kornizën aktuale kushtetuese e ligjore dhe në këtë kontekst, ajo shtoi se duhet të sigurohet pjesëmarrje demokratike e qytetarëve që jetojnë në këto katër komuna.