I dërguari i posaçëm i Bashkimit Evropian për dialogun Kosovë – Serbi, Miroslav Lajçak, ka dhënë detaje në lidhje me takimin e së martës me krerët e partive opozitare.
Përmes një postimi në Twitter, emisari Lajçak ka thënë se në lidhje me tensionet në veri, u ka sqaruar krerëve të partive opozitare dëmtimin e reputacionit ndërkombëtar të Kosovës dhe pasojat e krizës aktuale.
“Escobar dhe unë ua shpjeguam partive opozitare në Kosovë pasojat e krizës aktuale dhe dëmtimin e reputacionit ndërkombëtar të Kosovës”, ka shkruar Lajçak.
Lajçak ka kërkuar nga opozita ta mbështesin gjetjen e një zgjidhjeje politike për të zbutur tensionet në veri.
“Ne u kërkuam atyre të mbështesin një zgjidhje politike për t’i zbutur tensionet”.
Ndryshe, të martën, kryetarët e tri partive opozitare parlamentar, Memli Krasniqi i Partisë Demokratike të Kosovës, Lumir Abdixhiku i Lidhjes Demokratike të Kosovës dhe Ramush Haradinaj i Aleancës për Ardhmërinë e Kosovës, kanë takuar emisarin e Bashkimit Evropian për dialogun, Miroslav Lajçak dhe të dërguarin e ShBA-së për Ballkanin Perëndimor, Gabriel Escobar.
Takimi u mbajt në Zyrën e Bashkimit Evropian.
Pas këtij takimi, kryetari i Lidhjes Demokratike të Kosovës, Lumir Abdixhiku, deklaroi se Kosova gjendet në një moment kritik, e për këtë, sipas tij, përgjegjës është kryeministri Albin Kurti.
Ai tha para mediave të martën se mbetet të shihet se çfarë pasoja do të ketë Kosova nga delegacionet e Shteteve të Bashkuara të Amerikës, Bashkimit Evropian dhe të NATO-s që gjenden në vend.
Ndërsa, kryetari i Partisë Demokratike të Kosovës, (PDK) Memli Krasniqi, ka theksuar se nuk po shohin lëvizje përpara dhe se situata aktuale është duke e dëmtuar Kosovën.
Pas takimit me Osmanin, Escobar e Lajçak nisen të takojnë liderët opozitarë