Misioni i KFOR-it në Kosovë, i ka shprehur ngushëllime familjes Ademaj, dy familjarët e të cilës humbën jetën nga vërshimet në Pejë.
Në një postim në Twitter, KFOR-i shkroi që qëndron me njerëzit që po e përjetojnë këtë tragjedi.
“Komandanti i KFOR-it, në emër të të gjithë personelit të Misionit, shpreh ngushëllimet më të thella për familjen e dy qytetarëve që humbën jetën në përmbytjet e mbrëmshme në Pejë. Mendjet tona janë me njerëzit që po vuajnë nga kjo tragjedi”, thuhet në mesazh.
The Commander of #KFOR, on behalf of all Mission personnel, expresses his deepest condolences to the family of the two citizens who lost their lives in the flooding in #Peja last night. Our thoughts are with the people who are suffering from this tragedy. pic.twitter.com/gGOVzXuiJn
— NATO Kosovo Force – KFOR (@NATO_KFOR) June 25, 2023
Ndryshe, një nënë bashkë me fëmijën e saj 5 vjeç, kanë vdekur të shtunën në Pejë, si pasojë e vërshimeve, ka njoftuar Policia e Kosovës.
Sipas Policisë, nëna fillimisht është zhdukur, por është gjetur pas kërkimeve të ekipeve policore në lagjen “Asllan qeshme”.
Përveç tyre, në lagjen “Fidanishte”, po ashtu në Pejë, dy persona kanë pësuar lëndime trupore dhe janë dërguar në spital.
Kosova është përballur me vërshime në disa qytete edhe në janar të këtij viti.
Atëherë, Asociacioni i Komunave të Kosovës (AKK) pati kërkuar nga Qeveria e Kosovës që të mundojë krijimin e një fondi emergjent për komunat, në raste të tilla.
Shirat e rrëmbyeshëm shkaktojnë shpesh vërshime në Kosovë.