Kryetari i komunës së Prishtinës, Përparim Rama, ka deklaruar se ka shprehur dëshirën për ta takuar zyrtarisht kryeministrin Albin Kurti, por deri më tani nuk ka arritur ta bëjë një takim të tillë.
Rama, gjatë një interviste për emisionin “Kallxo Përnime,” ka theksuar se është e zakonshme që një kryeministër të takohet me kryetarin e kryeqytetit dhe të diskutojë për zhvillimin e Prishtinës.
“Përveç eventeve, asnjëherë nuk jam takuar me të. Kam kërkuar disa herë, por që nuk më ka pranuar. Një kryetar i kryeqytetit me kryeministrin është normale që të takohen të diskutojnë për çështje të ndryshme, por nuk e di pse ende s’jemi takuar”, ka thënë Rama.
Ai gjithashtu ka shtuar se janë takuar vetëm për festivalin “Suny Hill,” por ky takim ka qenë vetëm një pikë në kohë.
“Që nga ajo kohë, nuk kemi pasur takime. Mund të ketë arsye të tjera që ai ka punë më të rëndësishme, por kryeqyteti ka një rëndësi të madhe. Nuk di nëse është për shkak të apartizanëve, se ai nuk është nga Vetëvendosja dhe nuk takohet me mua, por kjo nuk duhet të jetë arsyetim për mospajtim me mua”, ka deklaruar Rama.