Ish-kryeministri i Kosovës, Isa Mustafa, ka thënë se drejtësia sot nuk e cilësoi kriminel avokatin, Besnik Berisha, i cili u arrestua nën dyshimin për kryerjen e veprave penale “Dhënia e ndihmës kryerësve pas kryerjes së veprave penale”, “Pengim i të provuarit apo procedurës penale” dhe “Ushtrim ndikimi”.
Sipas Mustafës, në këtë rast doli që kriminel “mund të jetë pushteti, që porositi apo ndikoi në arrestimin e tij”.
“Në arrestimin e kompetencës profesionale, arrestimin e guximit për të shprehur mendimin; arrestimin e dinjitetit njerëzor. Dolën të zhgënjyer ata që deshën të njollosin qeverinë që unë e drejtova duke aluduar se u arrestua për krim ish këshilltari i saj (do të thoja për “nacionalizëm e irredentizëm”, siç ua mveshte UDB-ja jugosllave atyre që i ndiqte ti eliminonte e s’kishte argumente dhe fakte për ndonjë vepër konkrete). Çdo gjë pritet nga ata, të cilët pas perdes merren vesh me pasuesit e Millosheviqit për tu organizuar bashkërisht për të kundërshtuar e kërkesat e Veteranëve të UÇK-së”, shkroi ai në Facebook.
Mustafa ka theksuar se duhet gëzuar se sipas tij gjyqësia, të cilën shpesh po e kritikojnë, pas debatit maratonik për këtë rast, u tregua e drejtë.
“Nuk u dorëzua para kërkesave absurde të karaxhozëve që deficitet e tyre profesionale i kompensojnë me aleanca me pushtetin; të cilët e harrojnë betimin e dhënë për zbatimin e Kushtetutës por bëhen hyzmeqarë të atyre që kanë dalë nga fakulteti pa bërë fakultet”.
Ai potencon se Kosova meriton shtet ligjor, avokatë të fortë e të guximshëm, prokurorë e gjyqtarë që zbatojnë ligjin dhe Kushtetutën e nuk veprojnë me porosi.
“Vetëm kështu, ne si qytetarë mund të ndihemi të sigurt. Nuk na bëjnë të sigurte sondazhet e partive politike por zbatimi i Kushtetutës dhe ndërtimi i shtetit të mirëfilltë ligjor”, vijon shkrimi i tij.