Kryetari i PDK-së, Memli Krasniqi, ka njoftuar se të enjten ka takuar ambasadorin e Zyrës së BE-së në Kosovë, Tomas Szunyog, në selinë e PDK-së.
Gjatë takimit, ata kanë diskutuar për zhvillimet politike të fundit në vend.
Krasniqi i ka shprehur ambasadorit qëndrimin e konsistent të PDK-së për integrimin euro-atlantik të Kosovës, duke e vlerësuar atë si një mision historik të shtetit dhe popullit të tyre.
“Ambasadorit Szunyog i shpreha qëndrimin konsistent të PDK-së se integrimi euro-atlantik për Kosovën është i paalternativë dhe nuk guxon të rrezikohet nga askush. Ky është vizioni e misioni historik i shtetit dhe popullit tonë”, ka njoftuar Krasniqi në rrjetin social, Facebook
Po ashtu, në deklaratën e tij, kryetari i PDK-së ka kritikuar ashpër qasjen e Qeverisë aktuale, e cila sipas tij, është përjashtuese me miq dhe koordinuese me kriminelë.
Ai e ka vlerësuar këtë qasje si të papranueshme dhe e ka akuzuar se po i sjell vetëm dëme vendit.
Për të adresuar këtë situatë, Krasniqi ka theksuar se zgjedhjet e parakohshme janë e vetmja rrugë për të sjellë një Qeveri kredibile në Kosovë.
“Qasja e kësaj Qeverie, përjashtuese me miq dhe koordinuese me kriminelë, për PDK-në është tërësisht e papranueshme dhe po i sjellë vetëm dëme vendit. Vetëm zgjedhjet e parakohshme mund t’ia sjellin Kosovës një Qeveri kredibile, ndryshe, dhe e cila rikthen vendin në kursin e duhur përpara”, ka shkruar ai.
Gjithashtu, kryetari i PDK-së ka falënderuar ambasadorin Szunyog për angazhimin e tij dhe i ka siguruar se partia e tij do të angazhohet fuqishëm për të luajtur një rol konstruktiv në interes të shtetit dhe qytetarëve të Kosovës përmes të gjitha mjeteve demokratike.