Deputeti nga radhët e Aleancës për Ardhmërinë e Kosovës, Pal Lekaj, ka thënë se Qeveria e Kosovës i ka injoruar vlerat e Ushtrisë Çlirimtare të Kosovës.
I ftuar në emisionin “Five”, në RTV Dukagjini, ku po diskutohet për takimin e AAK-së me shoqatat e dala nga lufta, Lekaj ka thënë se Qeveria aktuale në krye me kryeministrin e Kosovës, Albin Kurti, nuk është e interesuar për stabilitet politik.
“Kur jemi te qeveria, mendoj që qeveria ka bërë jo mirë që i ka injoruar këto vlera, sidomos veteranët e luftës. Të injorohesh nga qeveria e vendit tënd, mendoj që duhet menduar mirë për kë punon kjo qeveri? Veteranët duhet të kenë vendin e merituar dhe përkrahjen e fuqishme nga secila qeveri. Ne asnjëherë nuk e kemi kundërshtuar listën e fryrë të veteranëve mirëpo është një proces gjyqësor dhe nuk është qeveria ajo që mund ta largojë dikë por ëhstë vendim i gjykatës, duhet ta presim këtë vendim pastaj të mendohet se nëse dikush ka bërë shkelje e merr përgjegjësinë. Qeveria nuk është e interesuar të ketë stabilitet politik”.
“Qeveria po krijon kriza për të hequr vëmendjen nga mospuna”
Deputeti i AAK-së, theksoi se Qeveria po tenton që të shmang vëmendjen.
“Është puro tentim i qeverisë për të shmangur vëmendjen, që asgjë nuk ka bërë për premtimet që i ka bërë dhe krijon kriza për të zhvendosur vëmendjen”.
Lekaj: Kjo qeveri e ka emrin “Afera Zdravo”
Teksa pyetet për audio-incizimin, ku dëgjohet duke folur shefja e grupit parlamentar të Lëvizjes Vetëvendosje, Mimoza Kusari-Lilës dhe ish-deputeti i Listës Serbe, Sllavko Simiq, Lekaj të njëjtin e konsideron si “skandalin” më të madh.
Madje, ai e quan skandal më të madh sesa afera “Pronto”.
“Më i madh është skandali i Mimoza Kusarit sesa afera Pronto, sepse është munduar të frenojë një ligj me Listën Srpska dhe me njeriun e përndjekur nga organet kompetente. Afersa Zdravo është një emër që do të mbetet historikisht me njollë të zezë sa i përket veprimeve të VV-së sepse krejt gojën e kanë kuq e zi por po del që janë larg dhe i kanë mashtruar qytetarët vetëm sa për të qeverisur. Mendoj që jemi kthyer 20 vjet mbrapa”.
Sipas tij, Qeveria e Kosovës po vonohet në vendimet e saj, dhe po i krijon krizat dhe pas tyre po merren vendime që nuk po shkojnë në favor të zgjidhjes së problemit.
Ndryshe, në këtë takim, kryetari i Aleancës për Ardhmërinë e Kosovës, Ramush Haradinaj, ka akuzuar kryeministrin Albin Kurti sipas tij se u ka ngulur thikë pas shpine dy vlerave sublime të vendit, aleatëve ndërkombëtar dhe kategorive të dala nga lufta.
Kryetari i Aleancës për Ardhmërinë e Kosovës, Ramush Haradinaj, ka akuzuar kryeministrin Albin Kurti sipas tij se u ka ngulur thikë pas shpine dy vlerave sublime të vendit, aleatëve ndërkombëtar dhe kategorive të dala nga lufta.
Ai ka theksuar se është veteran i vërtetë, derisa sipas tij Kurti nuk është i tillë. Kritik ndaj Kurtit janë shprehur edhe organizatat e dala nga lufta, të cilët kanë thënë se kjo qeveri ka harruar rrugën e sakrificës së Kosovës.
Xhavit Jashari, nga Shoqata e Familjeve të Dëshmorëve të UÇK-së, ka thënë se do të presin vendimin e Gjykatës Kushtetuese për Ligjin për pagën minimale, që më pastaj të ndërmarrin veprimet e mëtutjeshme.
“Vendimet e fundit të kësaj Qeveria përmes deputetëve, ka bërë një gabim të madh. Ka bë tradhti ndaj kësaj kategorie. Mos ta keqpërdorin besimin që ia kanë dhënë qytetarët. Ata që e kanë marrë besimin të punojnë. Ne nuk do të heqim dorë nga qëndrimet e tona. Deri në interpretim të Kushtetuese ne do të presim, edhe pse jemi preku keq është ther dinjiteti i secilit qytetarë”, ka thënë Jashari.
Në këte takim ndër të tjerë ishte edhe kryetari i shoqatës “Zëri i Prindërve”, Bajram Qerkini, i cili përqafësuesit e shoqatave të dala nga lufta e UÇK-së, i ftoi, të ngrisin zërin e tyre. Ai ka kritikuar kryeministrin, Albin Kurtin, për situatën poltike të krijuar në vend.