Ministria e Mjedisit, Planifikimit Hapësinor dhe Infrastrukturës ka njoftuar se ka dorëzuar dy dosje në Prokurorinë Speciale, që dyshohet se kanë të bëjnë me shkelje të rëndë të ligjit.
Këtë e ka bërë të ditur zëvendësministri i Mjedisit, Avni Zogiani.
Në një postim në Facebook, Zogiani ka thënë se rasti i parë ka të bëjë me hapjen e procedurës për trajtimin termik të mbeturinave, për të cilin ka thënë se “grupet e ekspertëve të MMPHI kanë gjetur shkelje serioze dhe dyshime për manipulim të të dhënave e dokumentave”.
Ndërsa, rasti i dytë, po ashtu, ka të bëjë me dyshime për “keqpërdorime serioze në punët në fushën e ujërave, të cilat punë sipas Raportit të bërë nga Grupi i ekspertëve janë bërë pa kritere, me shkelje serioze të ligjit deri në masën që ka dyshime se punët janë paguar pa u vënë kurrë në praktikë”.
Ai pret që Prokuroria Speciale të gjejë kohë e vullnet për këto dosje.