Kryetari i Këshillit Kombëtar të Shqiptarëve në Luginën e Preshevës, Nevzad Lutfiu, ka organizuar një aksion simbolik para stacionit policor në Bujanoc, për të theksuar rëndësinë e respektimit të Kushtetutës së Serbisë në lidhje me numrin e policëve nga komuniteti shqiptar.
Në njoftimin e tij në rrjetin social, Facebook, ai ka përmendur Nenin 77 të Kushtetutës së Serbisë, i cili kërkon “përfaqësimin proporcional të pakicave nacionale” në organet shtetërore dhe në institucionet e tjera.
Lutfiu është shprehur se numri i policëve shqiptarë në Serbi është shumë i vogël dhe se disa prej tyre janë afër pensionit, ndërsa nuk është pranuar asnjë polic i ri nga komuniteti shqiptar në vitet e fundit.
“Respektojeni kushtetutën” ishte thirrja që i bëmë sot Ministrisë së Brendshme të Serbisë. Neni 77 i Kushtetutës së Republikës së Serbisë thotë: “Lidhur me punësimin në organet shtetërore, në ndërmarrjet publike, organet e krahinës, vetëqeverisjes lokale duhet të kihet parasysh përbërja nacionale dhe përfaqësimi proporcional i pakicave nacionale”. Numri i policëve shqiptarë është tejet i vogël, madje shumë prej tyre janë afër pensionit. As edhe një polic i pranuar në vitet e fundit nga komuniteti shqiptar”, ka shkruar ai në Facebook.
Po ashtu, ai ka bërë thirrje ndaj Bashkësisë Ndërkombëtare që të kthejë vëmendjen ndaj kësaj çështjeje dhe të ndihmojë në adresimin e diskriminimit të komunitetit shqiptar në Serbi që ai e përshkruan si një formë të diskriminimit dhe racizmit.