Të dielën, më 17 shtator, në orëN 16:10, njësitet policore në Uglarë të Graçanicës kanë ndaluar një veturë të regjistruar me targa të Serbisë, e cila dyshohet se ka hyrë në territorin e Kosovës duke iu shmangur pikave të rregullta kufitare.
Siç ka njoftuar Policia e Kosovës nëpërmjet raportit 24-orësh, drejtuesi i veturës ishte mashkull kosovar, ndërsa në veturë ka qenë edhe një pasagjer tjetër, shtetas serb.
“Uglare 17.09.2023 – 16:10. Njësitë policore kanë ndaluar një veturë me targa të Serbisë me drejtues të dyshuarin mashkull kosovar, veturë në të cilën ka qenë edhe një pasagjer i dyshuar mashkull shtetas i Serbisë. Dyshohet se vetura është futur në territorin e Republikës së Kosovës duke iu shmangur pikë kalimeve të rregullta kufitare”, thuhet në njoftim.
Lidhur me rastin, siç ka bërë të ditur policia, është konsultuar prokurori i shtetit, i cili ka rekomanduar që rasti të inicohet si “Kalim i paautorizuar i kufirit” ndaj të dyshuarve dhe të procedohet në procedurë të rregullt.