Presidentja e Kosovës, Vjosa Osmani, në një intervistë për “Reuters” ka akuzuar Serbinë dhe presidentin e saj, Aleksandër Vuçiq, se janë prapa sulmit terrorist të 24 shtatorit, në Basnjska të Zveçanit.
Në atë sulm terrorist mbeti i vrarë rreshteri i Policisë së Kosovës, Afrim Bunjaku, dhe një tjetër zyrtar policor mbeti i plagosur.
Osmani përmes kësaj intervistë i ka dërguar mesazh Vuçiqit, duke i thënë të ndalë pretendimet territoriale ndaj Kosovës.
“Kosova është nën sulm. Grupi (i armatosur) thjesht ushtroi synimet dhe motivet e Serbisë si shtet dhe Vuçiqit si udhëheqës. Ajo që unë do t’i thosha presidentit Vuçiq është ndaloni ngatërresat me Kosovën. Kosova do ta mbrojë lirinë, pavarësinë dhe sovranitetin e saj me çdo çmim. Ata po përpiqen të kryejnë një model të Krimesë në Republikën e Kosovës, por ne absolutisht nuk do ta lejojmë të ndodhë… [ne] do të mbrojmë çdo pëllëmbë të territorit të Kosovës”, ka thënë Osmani për Reuters.
Osmani ka thënë se sulme të ngjashme mund të përsëriten edhe në një të ardhme të afërt dhe kërkoi nga bashkësia ndërkombëtare që të bëjë gjithçka që Serbia të mos përkrahë grupe të tilla.
“Jam shumë e shqetësuar se sulme të tilla, qoftë edhe më të mëdha, mund të ndodhin në të ardhmen nëse Serbia nuk dënohet, para së gjithash për këtë akt terrorist agresioni”, ka theksuar Osmani.
Osmani ka shtuar se bisedimet mes Kosovës dhe Serbisë nuk mund të vazhdojnë si më parë.
“Ne kemi qenë viktima të një agresioni të Serbisë dhe të gjithë duhet ta trajtojnë atë si të tillë, edhe në qasjen e tyre ndaj Serbisë tani e tutje”, ka thënë ndër të tjera ajo.