Emisari Special i BE-së për dialogun Kosovë – Serbi, Miroslav Lajçak, i është përgjigjur kryeministrit, Albin Kurti, ndaj akuzave të tij se po “koordinohet fshehurazi” me Beogradin.
Kurtit, Lajçaku iu përgjigj nga forumi 2BS që po mbahet në Budva, duke theksuar se nuk ka të ardhme evropiane pa dialog.
“Kur nuk të pëlqen mesazhi, e sulmon lajmëtarin. Kështu funksionon. Dialogu është këtu që nga 2011. Ka pas qeveri të ndryshme në Kosovë e Serbi, përfaqësues të ndryshëm nga BE-ja por dialogu është e vetmja rrugë, sepse fakti është shumë i thjeshtë nuk ka të ardhme evropiane pa normalizim të marrëdhënieve mes Kosovës dhe Serbisë. Dhe nuk ka normalizim pa Dialog, kjo është më e rëndësishmja. Sa më shpjet të gjejmë një marrëveshje do të jetë mirë për Kosovën, Serbinë dhe për rajonin”, ka thënë Lajçak.
Kurti gjatë muajit shtatori pati thënë se të dy (Lajçak dhe Aleksandër Vuçiq) kishin për qëllim që marrëveshja bazike në mes të Kosovës dhe Serbisë të mos zbatohej në plotni, por vetëm pjesa për Asociacionin.
“E kuptova që dokumenti i Serbisë që në titull tregonte shpërfilljen e marrëveshjes bazike, së pari zbatimi i Asociacionit dhe pastaj diskutimi për planin e BE-së, në fakt ishte shndërruar në qëndrim të Lajçakut. Si i tillë, Lajçaku dhe Vuciqi dukej se ishin koordinuar, me një qëllim të vetëm që ta bëjnë të pamundur një skenar në të cilin marrëveshja zbatohet në plotni dhe t’i japin jetë një skenari alternativ, që gjysma e marrëveshjes zbatohet, kurse pjesa tjetër të mos zbatohet”, pati thënë ai.