Kryetari i Malishevës, Ekrem Kastrati ka kujtuar 15 maturantët që para 19 vitesh kishin vdekur derisa po ktheheshin nga ekskursioni në Shqipëri.
Kastrati ka thënë se 14 tetori i vitit 2004 ishte datë e errët, “kur ne humbëm tragjikisht në Fushë Arrëz të Shqipërisë, 15 maturantë të komunës së Malishevës”.
“Sot 19 vite më parë, pra, 14 tetori i vitit 2004, është datë e errët kur ne humbëm tragjikisht në Fushë Arrëz të Shqipërisë, 15 maturantë të komunës së Malishevës, tek sa po ktheheshin nga ekskursioni në shtetin tonë amë, duke shënuar kështu këtë ngjarje shumë tragjike për ne, ku i gjithë kombi shqiptar ishte i pikëlluar dhe i thyer nga kjo fatkeqësi e hidhur”, ka shkruar Kastrati.
Këtë të shtunë janë bërë 19 vjet që kur 15 maturantë të shkollës së mesme “Abdyl Frashëri” nga Malisheva kanë humbur jetën gjatë një ekskursioni që po bënin në Shqipëri.
Lexo dhe: 19 vjet nga tragjedia e maturantëve të Malishevës
Autobusi, që po barte 15 maturantët që s’janë më dhe 34 shokë të tyre që u lënduan rëndë, u rrokullis dhe ra në humnerë. Aksidenti u shënua rreth orës 14:00 të datës 14 tetor 2004, në Fushë Arrëz të Pukës.