Presidentja e Kosovës, Vjosa Osmani, priti të mërkurën në takim ambasadoren e re jorezidente të Kanadasë në Kosovë, Jessica Blitt, e cila i dorëzoi letrat kredenciale.
Presidentja Osmani e ka uruar ambasadoren për detyrën dhe shprehu mirënjohje të thellë për mbështetjen e Kanadasë për Kosovën dhe bashkëpunimin e shkëlqyeshëm.
Ndërkaq, ambasadorja Blitt ka shtuar se nga ana e saj do të ketë edhe angazhim më të madh në fusha të ndryshme të interesit të përbashkët për të dy shtetet, sidomos në çështjet që kanë të bëjnë me fuqizimin e grave dhe barazinë gjinore.
Në këtë takim, siç thuhet nga Zyra e Presidencës, është konfirmuar gatishmëria për hapjen e kapitujve të rinj të bashkëpunimit, si dhe angazhimi i përbashkët i avancimit të Agjendës për Gratë, Paqen dhe Sigurinë.
Presidentja e ka njoftuar ambasadoren Blitt edhe për zhvillimet e fundit në fushën e sigurisë në vend, me ç’rast potencoi rëndësinë e madhe të vazhdimit të bashkëpunimit me aleatë, si dhe nevojën për të vënë autorët e aktit të agresionit të 24 shtatorit para përgjegjësisë.