Gjatë marrjes në pyetje të dëshmitarit, Dragan Ivanisheviq, mbrojtja e Hashim Thaçit, Luka Misetic, e pyeti nëse ai ka dëgjuar për vrasjen e 1 mijë civilëve të vrarë më 2 maj të 1999-s në Vushtrri.
“Jo, është herë e parë që e dëgjoj këtë. Është hera e parë që dëgjoj për këta 1 mijë persona”, tha dëshmitari, raporton “Betimi për Drejtësi”.
Fillimisht, pyetja u kundërshtua nga Zyra e Prokurorit të Specializuar, ndërsa avokati Misetic tha se po përpiqet që të kuptojë se çfarë pjesëmarrje ka pasur dëshmitari në ngjarjet e 2 majit të 1999-s.
Mirëpo, pyetja u lejua nga kryetari i trupit gjykues, ku Misetic pyeti dëshmitarin nëse është në dijeni për vrasje të civilëve në zonën e Vushtrrisë.
“Jo. Kam dëgjuar që janë vrarë civilë dhe datën nuk e di dhe nuk e di sa persona. Kam dëgjuar që ka ndodhur vrasje individuale.”, tha dëshmitari, duke theksuar se ka dëgjuar me njerëz të cilët është shoqëruar, por jo persona nga njësiti i tij.
“Nuk mund t’ua them me saktësi a kam dëgjuar nga personat që i njihja. Personat me të cilët shoqërohesha”, tha dëshmitari.
Dëshmitari Dragan Ivanisheviq, gjatë dëshmisë së tij në gjykimin ndaj ish-presidentit Hashim Thaçi dhe të tjerëve, ka thënë se në kohën kur ka filluar lufta ka qenë i mobilizuar në ushtri si dhe ka shërbyer në njësitin “Mbrojtja territoriale”, në Vushtrri.
“Në ‘99 u mobilizova, u mobilizova sigurisht kur filloi lufta. Që prej 25 marsit të vitit (1999) deri më 14 qershor 1999. Ishte njësiti i ‘Mbrojtjes territoriale’ në Vushtrri”, tha Ivanisheviq.
Ivanisheviq tha se ka qenë në zonën e Vushtrrisë, por ndonjëherë ka shkuar që të ofrojë ndihmë edhe në vendet e tjera.
“Kam qenë në këtë zonë. Ndonjëherë shkonim të ofronim ndihmë në vendet e tjera. Unë isha gjatë gjithë kohës në Vushtrri, por isha edhe në fshatrat rreth e rrotull. Kam qenë në fshatin tim. Kam qenë edhe në disa vende, në vende që na dërgonin për ndihmë”, tha dëshmitari Dragan Ivanisheviq.