Ministria e Punëve të Jashtme dhe Diasporës do ta vazhdojë aktivitetin në ditën e dytë të punimeve të Forumit Ndërkombëtar Ulpiana, i cili po mbahet për herë të parë në Prishtinë.
Pjesë e këtij Forumi janë pjesëmarrës nga 21 shtete nga e gjithë bota, me, gjithsej, 48 folës në gjashtë panele të ndryshme, për të diskutuar tema nga më të ndryshme, me udhëheqës nga fusha e migrimit, e zhvillimit dhe e diasporës, përfaqësues nga organizata ndërkombëtare, akademia, shoqëria civile dhe media.
Tema e ditës së sotme do të jetë “Migrimi përmes Angazhimit të Diasporës: Një Dimension i Ri për Bashkëpunimin Diplomatik dhe Zhvillimor”.
Sipas agjendës, fillimisht do të flasë ministrja Donika Gërvalla, pastaj me radhë ministri i Punëve të Jashtme i Maqedonisë së Veriut, Bujar Osmani, Zdenko Luciq, sekretari i Shtetit për Çështjet e Jashtme dhe Evropiane të Kroacisë dhe Artemis Malo, zëvendësministri për Evropën dhe Punët e Jashtme i Shqipërisë.
Pastaj do të diskutohet për temën: “Nga politika në praktikë: Modele të suksesshme në rolin e qeverisë në angazhimin e diasporës”.
Për këtë temë do të flasin zyrtarë nga Nepali, Sierra Leone, Gana e Kroacia.
Temat e tjera për diskutim do të jenë: Digjitalizimi i Diasporës: Nga A.I. te Rrjetet e A&I., Të dhënat për diasporën: Ndërtimi i shkallës në komunikim, rrjetëzimi dhe shtrirja për angazhimin e diasporës, Modeli i Angazhimit të Diasporës së Kosovës: Nga shërbimi në angazhim, Diaspora dhe Lidhja e Paqes për Zhvillimin Humanitar: Gjenerimi i Ndikimit në Klimë, Humanitarizëm, Siguri dhe Rini, Diaspora & Talenti: Një kufi i ri për një ekonomi të diturisë pa kufi, Diaspora dhe Transformimi Ekonomik: Shpërndarja përmes dhe përtej remitancave etj.
Punimet e Forumit Ulpiana do të jenë të përqendruara në panele ekspertësh nga sektorë të ndryshëm si: akademia, shoqëria civile, biznesi, të cilët do të diskutojnë tema specifike, të lidhura me angazhimin e diasporës dhe zhvillimet ndërkombëtare, përfshirë kulturën, zhvillimin ekonomik, diplomacinë publike, sigurinë, teknologjinë, të rinjtë dhe hartimin e politikave.