Analisti, Ylli Hoxha, në “Debat Plus” në RTV Dukagjini, e vuri në diskutim deklaratën e kreut të LDK-së, Lumir Abdixhiku, ku i ishte drejtuar kryeministrit Albin Kurti se të bashkuar do të mund të kishin bërë më shumë në këtë drejtim.
Hoxha i tha Abdixhikut se si opozitë e kanë mundësinë ta durojnë kryeministrin “të bëjë gabime më të mëdha” ose mund të ndërmarrin diçka për ta ndaluar këtë situatë.
Për këtë, Abdixhiku ka thënë se është i brengosur për fatin e vendit të tij dhe fatin e vendit ku do të rriten fëmijët e tij.
“Jam i brengosur për fatin e vendit tim dhe fatin e vendit ku do të rriten fëmijët e mi dhe tuaj, kjo është brenga ime. Por, tani keni parasysh se përballë kam një njeri që vjen të raportojë në Kuvend dhe thotë që Vuçiq po ju kërkon juve. E tani kur Vuçiq të kërkon ty, të bën që ti je tradhtar, e për tradhtarët ka një alternativë, e që nuk është bashkëpunimi. Tani ne fillimisht duhet të shkojmë në shtëpi të ju themi fëmijëve që ne përbesë nuk jemi me Serbinë teksa kthehen prej shkollave. Kjo është gjuhë e ndytë politike e një njeriu të humbur në hapësirë”, ka thënë Abdixhiku.
Abdixhiku është shprehur se nëse një anëtari të LDK-së i ndodh diçka si pasojë e kësaj gjuhe, atëherë përgjegjësia duhet të kërkohet nga kryeministri i Kosovës, Albin Kurti.