Kryeministri i Kosovës, Albin Kurti, ka takuar gazetarët nga Ukraina dhe Afganistani, që po strehohen në Kosovë nëpërmjet programit Journalists-in-Residence (JiR Kosovo).
Takimi në mes tyre u bë në rezidencën e ambasadorit gjerman në Kosovë, Jörn Rohde, së bashku me përfaqësues të Asociacionit të Pavarur të Gazetarëve dhe Qendrës Evropiane për Liri të Shtypit dhe Medieve.
Kryeministri Kurti i ka siguruar se ata janë të mirëpritur në Kosovë dhe se populli i Kosovës e kupton shumë mirë se si është të jesh larg vendlindjes dhe familjes, e pa e ditur se kur do të mund të kthehesh përsëri.
“Ai uroi që vitin tjetër do të jetë e mundur për ata që të kthehen të sigurt në vendet e tyre të origjinës, por se deri atëherë dhe përherë le ta konsiderojnë Kosovën si shtëpinë e tyre të dytë”, ka njoftuar Kryeministria.
Journalists-in-Residence (JiR Kosovo) është program që financohet nga Qeveria e Republikës së Kosovës dhe i cili mbulon koston e jetesës, pagat dhe zyrat, për t’u mundësuar gazetarëve të strehuar të punojnë nga distanca.
Nga shkurti i vitit 2022, deri më tani janë 23 gazetarë përfitues, prej të cilëve 18 ukrainas dhe 5 afganë. 15 gazetarë vazhdojnë të banojnë ende në Kosovë. Ky program zbatohet nga Asociacioni i Gazetarëve të Pavarur të Kosovës, me mbështetjen e iniciativës Hannah Arendt.