Kryeministri i Republikës së Kosovës, Albin Kurti, së bashku me ministrin e Financave, Hekuran Murati, kanë vizituar sot Agjencinë e Statistikave të Kosovës (ASK), ku u prit nga u.d. Avni Kastrati dhe stafi tjetër.
Kurti ka shkruar se “u njoftuam së afërmi me punën e cila po zhvillohet në realizimin e procesit të regjistrimit të popullsisë, në muajin prill të vitit të ardhshëm”.
Regjistrimi i popullsisë është proces i rëndësishëm për shtetin, për statistika e të dhëna të sakta, të nevojshme për zhvillimin dhe targetimin e duhur të politikave e strategjive të Qeverisë.
Tutje, në postim thuhet se Kurti bashkë me ministrin Murati theksuan se duhet “angazhim serioz e përkushtim i lartë për ta planifikuar e zhvilluar me sukses këtë proces”.
“Vëmendje e veçantë dhe për modalitetet e regjistrimit dhe për diasporën, përmes platformës e-Kosova”, shkroi tutje Kurti.