Policia e Kosovës së bashku me Prokurorinë kanë realizuar sot një aksion në Pejë, Istog dhe Klinë kundër veprimtarive të strukturave ilegale.
Ministri i Punëve të Brendshme, Xhelal Sveçla, e ka konfirmuar mbylljen e zyrave të komunave paralele serbe.
“Pas një koordinimi të ngushtë mes Policisë së Kosovës, Prokurorisë dhe Agjencisë së Kosovës për Inteligjencë, me urdhër të Prokurorisë, Policia sot ka zhvilluar një aksion në mbylljen e strukturave paralele të Serbisë që kanë operuar brenda Republikës së Kosovës. Me këtë rast, në Gorazhdec është mbyllur komuna ilegale e Pejës, në Osojan komuna paralele e Istogut dhe në Videjë komuna paralele e Klinës. Mbesim të përkushtuar në fuqizim institucioneve të Republikës së Kosovës, në respektim të plotë të Kushtetutës sonë dhe unitaritetit të saj”, ka thënë Sveçla.
Sveçla ka theksuar se “koha e paligjshmërisë ka përfunduar dhe institucioni i vetëm i Serbisë brenda Republikës së Kosovës do të jetë ambasada e saj në Prishtinë”.
