Nënkryetarja e Komunës së Prishtinës nga radhët e Partisë Demokratike të Kosovës(PDK), Donjeta Sahatçiu, e ka cilësuar si revansh personal të kryetarit Përparim Rama, shkarkimin që i bëri drejtorit të Shërbimeve Publike, Ilirik Musliu.
Sipas saj, shkarkimi i tij lidhet me kundërshtimin që PDK-ja, si partnere e koalicionit në kryeqytet, i ka bërë këmbimit të pronave.
“Revanshi i Përparim Ramës ka emër: Badovc”, ka shkruar Sahatçiu përmes një postimi në rrjetin social Facebook.
Sahatçiu ka deklaruar se “shkarkimi i fshehur i Ilirik Musliut sot përmes rrjeteve sociale, pa e komunikuar tek ai dhe askush tjetër rreth tij, është revansh i pastër. Na duket si revansh politik por nga një jopolitikan si Përparim Rama, revanshet janë personale”.
Madje, ajo ka shtuar se më 2 shkurt 2022 me Ilirikun i janë bashkuar qeverisjes në Prishtinë, dhe po në të njëjtën datë, më 2 shkurt 2024, kryetari i Prishtinës, Përparim Rama, ka filluar revanshin publik.
Postimi i plotë:
Revanshi i Përparim Ramës ka emër: Badovc
Ilirik Musliu ka qenë motorri i qeverisjes së mirë të PDK në Prishtinë. Me Ilirik Musliun, problemi i mbeturinave as nuk ka fillu e as nuk ka pas mundësi me u mbyll. Ky është problemi më kompleks i Kryeqytetit, e për këtë kemi shumë për të thënë.
Përparim Rama në dhjetor dha urdhër për fillimin e procedurave të prokurimit për digjitalizim në arsim pa njohurinë time pasi unë, në cilësinë e U.D. Drejtore e Arsimit, nuk pata pranuar të nënshkruaj deklaratë disponueshmërie për një proces të dëmshëm, pa leje nga ASHI, kundër rekomandimeve të auditorit, me specifika e planifikim buxheti skandaloz. Njejtë, Përparim Rama, si Zyrtar Kryesor Administrativ, ka mundur të jep urdhër për çfarëdo procesi që paska mundur të rregullojë menaxhimin e mbeturinave, pa njohurinë dhe përfshirjen e Ilirikut. Pse nuk e ka bërë, e din ai vetë.
Shkarkimi i fshehur i Ilirik Musliut sot përmes rrjeteve sociale, pa e komunikuar tek ai dhe askush tjetër rreth tij, është revansh i pastër. Na duket si revansh politik por nga një jopolitikan si Përparim Rama, revanshet janë personale.
Ky shkarkim, që i madh e i vogël sot në Prishtinë e di se nuk ka fare të bëjë me mbeturina e me Ilirikun, vjen pasi si PDK ritheksuam publikisht qëndrimin tonë politik që nuk do të mbështesim me asnjë kusht propozimin e tij për këmbim pronash me epiqendër zonën e Badovcit dhe çdo propozim tjetër që dëmton interesin publik.
Më 2 shkurt 2022 me Ilirikun i’u bashkuam qeverisjes në Prishtinë. Më 2 shkurt 2024, Përparim Rama filloi revanshin publik.
Rama shkarkon nga detyra drejtorin e shërbimeve publike nga radhët e PDK-së