Ambasadori gjerman në Kosovë, Jorn Rohde, ka mbështetur deklaratën e lëshuar nga Bashkimi Evropian, ku theksohet shqetësimi lidhur me operacionet e Policisë së Kosovës ku janë mbyllur institucionet e drejtuara nga Serbia.
Përmes një reagimi në platformën X, Rohde konsideron se masat e “njëanshme” vetëm se nxisin tensione.
“Masat e njëanshme vetëm sa i hedhin benzinë zjarrit dhe janë pikërisht e kundërta e uljes së tensioneve. Dialogu i udhëhequr nga BE-ja ndërmjet Kosovës dhe Serbisë është forumi i vetëm i përshtatshëm për të adresuar këto çështje”, ka shkruar Rohde.
Bashkimi Evropian, përmes një komunikate për media ka reaguar lidhur me veprimet e fundit të Qeverisë së Kosovës.
Në një deklaratë të lëshuar të dielën në mëngjes nga Shërbimi i Veprimit të Jashtëm të BE, -së (EEAS) kërkohet që statusi i këtyre institucioneve të zgjidhet përmes dialogut në kuadër të themelimit të Asociacionit të komunave me shumicë Serbe.
BE-ja, i është bashkuar kritikave të SHBA-së për operacionet e autoriteteve të Kosovës në institucionet komunale në Kosovë të administruara nga Serbia.
“Bashkimi Evropian nënvizon me shqetësim të thellë operacionet e Policisë speciale në zyrat e institucioneve të udhëhequra nga Serbia në komunat e Dragashit, Pejës, Istogit dhe Klinës si dhe në objektet e organizatës joqeveritare Qendra për paqe e tolerancë në Prishtinë. Mbyllja e papritur e këtyre zyrave do të ketë efekte negative për kushtet jetësore të përditshme për komunitete e serbëve të Kosovës, dhe do të kufizojë qasjen e tyre në shërbimet bazike sociale duke pasur parasysh mungesën e alternativave alternativave në këtë moment”, thuhet në këtë deklaratë të lëshuar nga zëdhënësi.
Sipas BE-së, mbyllja e papritur e këtyre zyrave do të ketë efekte negative në jetën e përditshme dhe kushtet e jetesës së komuniteteve serbe të Kosovës.
“Statusi i këtyre strukturave është paraparë të zgjidhet përmes dialogut të lehtësuar nga BE-ja, në lidhje me themelimin e Asociacionit/Bashkësisë së komunave me shumicë serbe. Prandaj BE-ja kërkon nga Kosova që t’i evitojë veprimet e njëanshme të cilat mund të nxisin tensione dhe t’i adresojë këto çështje përmes dialogut të lehtësuar nga BE-ja”.
Në anën tjetër, ambasadori amerikan në Kosovë, Jeffrey Hovenier, ka akuzuar Qeverinë e Kosovës se po nxit tensione ndëretnike me veprimet e fundit.