Kryeministri i Kosovës, Albin Kurti, të mërkurën i shoqëruar nga Ministri i Financave, Punës dhe Transfereve, Hekuran Murati, kanë pritur në takim zëvendëspresidenten e Bankës Botërore për Evropën dhe Azinë Qendrore, Anna Bjerde.
Siç bëhet e ditur nga Zyra e Kryeministrit , përveç Anna Bjerde, në këtë takim kanë marrë pjesë edhe drejtoresha rajonale e Bankës Botërore për Ballkanin Perëndimor, Linda van Gelder, drejtoresha e re rajonale për Ballkanin Perëndimor, Xiaoqing Yu, si dhe Menaxheri i zyrës së Bankës Botërore për Kosovë, Massimiliano Paolucci.
Sipas njoftimit, në këtë takim përfaqësuesit e Bankës Botërore kanë thanë se presin që së shpejti të kalojë në Kuvend marrëveshja për reformën sociale, sepse “ajo është përgjigja e duhur ndaj krizës inflacionare dhe jo prekja e mjeteve të trustit pensional”.
Po ashtu, thuhet se në takim është biseduar edhe për stabilitetin institucional dhe indikatorët pozitivë.
“Kryeministri veçoi rritjen e eksporteve dhe potencialin e madh në fushën e teknologjisë së informacionit si dhe angazhimin e qeverisë për digjitalizim po ashtu edhe Bjerde e përgëzoi Qeverinë për rritjen ekonomike që ishte ndër më të lartat në rajon”, thuhet më tutje.
Sipas Kurtit, përparësi dhe pasuri e vendit tonë është thksuar kapitali njerëzor, prandaj Qeveria është fokusuar te investimet në fëmijërinë e hershme, në kopshte e parashkollorë.
“U fol për rëndësinë që ka arsimimi profesional në parandalimin e migrimit të të rinjve. Kryeministri theksoi mbështetjen e Qeverisë për vajzat në STEM, me qëllim të mbylljes së hendekut gjinor në profesione”, thuhet në këtë komunikatë.
Tutje, thuhet se Kurti ka shprehur mirënjohjen e Qeverisë së Kosovës për mbështetjen e Bankës Botërore për Kosovën në shumë fusha.
“Ai veçoi projektin për përballjen me pandeminë Covid-19. Lidhur me situatën stabile aktuale në vend, u theksua se tash e disa ditë kemi regjistruar numra një shifror të të infektuarve me këtë virus. Znj.Bjerde cilësoi si impresive shkallën e vaksinimit që Kosova ka arritur”, thuhet në komunikatë.
Duke biseduar për situatën aktuale me energji elektrike, është përmendur edhe ndikimi i luftës në Ukrainë.