Prokuroria Speciale e Republikës së Kosovës (PSRK), ka ngritur aktakuzë në Gjykatën Themelore në Prishtinë – Departamentin Special, kundër gjashtë të pandehurve me iniciale F.L., Sh.R., H.L., A.O., A.Q dhe L.S.
Ata akuzohen se kanë kryer veprat penale shpëlarja e parave si dhe posedim të armëve pa leje.
Sipas Prokurorisë Speciale të Kosovës, të dyshuarit kanë poseduar shumën e të hollave prej njëqindenjëzetepesë mijë e dyqindedyzet (125.240.00) euro, kartëmonedha me ngjyrë, edhe pse e kanë ditur se të njëjtat janë përfituar përmes aktivitetit kriminal “të cilët i kishin siguruar ato me përdorimin e forcës apo mjeteve tjera të forta tek institucionet financiare brenda apo jashtë Kosovës”
“A.Q dhe L.S., me dashje dhe duke e ditur se pasuria e caktuar, shuma e të hollave prej njëqindenjëzetepesë mijë e dyqindedyzet (125.240.00) euro, të cilat ishin kartëmonedha me ngjyrë, është siguruar përmes aktivitetit kriminal, janë përpjekur që t’i këmbejnë ato me para origjinale në shumën prej 30 % të shumës së përgjithshme, t’i transferojnë ato tek personat e tretë me qëllimin që të njëjtat të pastrohen dhe të vihen në qarkullim si të siguruara në mënyrë të ligjshme për të fshehur në këtë mënyrë natyrën dhe burimin e vërtetë”, thuhet në njoftimin e prokurorisë.
Po ashtu, në njoftim thuhet se njërit nga të pandehurit i është gjetur në shtëpinë e tijë armë gjuetie, dylbi e vendosur në armë, karikator, thikë dhe fishekë.
Kurse të pandehurit tjetër sipas prokurorisë i është gjetur një pistoletë që e kishte pa leje.
“Po ashtu, i pandehuri A.O., në shtëpinë e tij ka mbajtur në pronësi, kontroll dhe posedim një armë gjuetie “mosberg patriot” kalibri 30.06 Laser i armës, Dylbi e vendosur në armë, Karikator i zbrazet, thikë me futrollë me mbishkrim Byker, 20 fishek kalibri; ndërsa i pandehuri L.S., në shtëpinë e tij ka mbajtur në pronësi, kontroll dhe posedim një pistoletë të tipit Zoraki M906T me katër copë fishek kalibër 7.65 mm, në shkelje të ligjit të zbatueshëm lidhur me armët e tilla”, thuhet në njoftim.
Në lidhje me çështjen e falsifikimit të parave Portali D, kishte raportuar edhe më herët, ku kishte treguar për lehtësinë e tregtisë me to haptazi nëpërmjet rrjeteve sociale. Sipas Policisë së Kosovës, në vitin 2021 janë iniciuar mbi 800 raste të klasifikuara si “falsifikim i parasë”, derisa tremujorin e parë të vitit 2022, ka pasur mbi 200 raste të tilla.