Deputeti i Lidhjes Demokratike të Kosovës (LDK), Avdullah Hoti, ka thënë se raporti i Bankës Botërore e ka demantuar faktin që ka zhvillim ekonomik në Kosovë.
“Zhvillimi ekonomik në Kosovë – Raporti i Bankës Botërore demanton propagandën’, ka shkruar Hoti.
Hoti i ka radhitur disa raste, që, sipas tij, raporti i lartcekur e ka demantuar zhvillimin ekonomik në vend;
“-Popullsia në moshë punë është zvogëluar për shkak të migrimit. Rritja e mëtejmë e migrimit do të zvogëlojë më tutje ofertën e punës dhe do të rrisë kostot e punës për biznese. Ndërkaq, pushteti thotë se më shumë njerëz po kthehen në Kosovë se që po largohen.
-Produkti i Brendshëm Bruto i Kosovës u rrit me 3.1 përqind në 2023 si rezultat i rënies së çmimit të mallrave në tregjet ndërkombëtare, dërgesave nga diaspora dhe rritjes së kreditimit nga banka. Pra, qeveria nuk ka kontribut në këtë rritje që sido që të jetë është shumë e ulët për të siguruar konvergjencë në zhvillim e të ardhura mes Kosovës dhe mesatares së BE-së.
-Më shumë se gjysma e investimeve të jashtme janë në ndërtimtari. Kjo nuk kontribuon në rritjen e bazës prodhuese në vend.
-Rritja e statistikave zyrtare të punësimit ka qenë kryesisht rezultat i uljes së informalitetit, e jo i krijimit të vendeve të reja të punës”.