Policia e Kosovës ka njoftuar se sot [e hënë], gjatë një bastisje në fshatin Zamenicë të Leposaviqit, ka gjetur narkotikë, armë zjarri dhe municion.
Sipas komunikatës për media, bastisja njoftohet se ka ndodhur të hënën pas pranimit të informacioneve se një i dyshuar ka në posedim substanca narkotike.
Sipas njoftimit, janë sekuestruar gjashtë qese me sasi të substancës së dyshuar të llojit marihuanë me peshë rreth 2600 gramë, një pushkë gjuetie dy tytëshe me 26 fishekë, katër karikatorë të armës së gjatë AK-47, me gjithsej 23 fishekë dhe një radiolidhje.
“Në lidhje me rastin njësia e forenzikës ka bërë fotografimin dhe sekuestrimin e provave, po ashtu është njoftuar edhe prokurori kompetent ku me udhëzim të tij janë iniciuar rastet ‘Blerja, posedimi, shitja dhe shpërndarja e paautorizuar narkotikëve substancave psikotrope apo analoge’ dhe ‘Mbajtje në pronësi, posedimi i pa autorizuar i armës’. Lidhur me rastin personi i dyshuar nuk është hasur në shtëpi dhe i njëjti ndodhet në kërkim policor, derisa rasti është duke u trajtuar nga njësitë relevante policore sipas kompetencës”, thuhet në njoftim.
