“Përjetësisht mirënjohës ndaj SHBA-ve, NATO-s dhe të gjithë miqve tanë, të cilët përkrahën luftën tonë”.
Kështu është shprehur ministrja e Arsimit, Arbërie Nagavci, në 23-vjetorin e Ditës së Çlirimit të Kosovës.
Me anë të një postimi në llogarinë e saj në Facebook, Nagavci ka thënë se në këtë ditë kujtohen dhimbjet e panumërta që solli lufta.
“Ishte kjo dita e parë e lirisë, për të cilën shumë breza ëndërruan dhe u flijuan. Kujtojmë ata që nuk janë më, ata që ranë për liri dhe ata që në mënyra të ndryshme e bënë luftën për ta mbrojtur atdheun”, ka thënë ajo.
“Ta bëjmë lirinë përditë e më të bukur për fëmijët tanë, me punë e përkushtim, sepse sot ky është misioni ynë, kjo është atdhedashuria”, shtoi ministrja Nagavci.
Ndryshe, të dielën e 12 qershorit, janë shënuar 23 vjet nga vendosja e 50 mijë ushtarëve të NATO-s në Kosovë dhe bashkë me ta, edhe administrata e përkohshme e Kombeve të Bashkuara.
Bombardimet e NATO-s kundër Serbisë nisën më 24 mars 1999 dhe zgjatën 78 ditë.
Pas 78 ditësh të sulmeve, bombardimet u ndërprenë më 10 qershor 1999, me miratimin e Rezolutës 1244 të Këshillit të Sigurimit të Kombeve të Bashkuara (OKB).
Ndërhyrja e NATO-s në Kosovë kishte për qëllim ndalimin e spastrimit etnik ndaj kosovarëve. Pas bombardimeve të NATO-s u mundësua kështu, kthimi i mbi 800 mijë refugjatëve kosovarë në vendlindje.