Ministrja e Punëve të Jashtme dhe Diasporës, Donika Gërvalla, e ka pritur në vizitë zyrtare ministrin Federal për Çështjet Evropiane dhe Ndërkombëtare të Republikës së Austrisë, Alexander Schallenberg.
Takimi mes Gervalles dhe Schallenberg po mbahet me dyer të mbyllura, derisa pas takimit do të ketë konferencë për media.
Pos këtyre takimeve, Schallenberg do të takojë përfaqësuesit e shoqërisë civile.
Kryediplomati austriak më pas do të takohet edhe me kontingjentit austriak të KFOR-it.
Vizita e Schalenberg në Kosovë vjen pas asaj në Serbi.
Në takim me kryediplomatin serb, Nikola Selakoviç, ai i ka shprehur këtij të fundit nevojën për progres në dialogun Kosovë-Serbi si gjë të rëndësishme për stabilitetin rajonal.
“Nëse flasim për siguri, normalizimi gradual i marrëdhënieve mes Beogradit dhe Prishtinës është tejet i rëndësishëm. Jam i kënaqur që Presidenti i Serbisë, Aleksandër Vuçiç, tha të premten se do të provonte të bënte progres [në dialog]”, ka thënë Schallenberg.
Schallenberg në nëntor të vitit të kaluar ishte takuar me kryeministrin Kurti, me të cilin kishin biseduar për dialogun Kosovë-Serbi.