Asociacioni i Gazetarëve të Kosovës (AGK), ka shprehur shqetësim të thellë lidhur me një sërë videosh kërcënuese, kryesisht në platformën Tik Tok, ndaj gazetarëve dhe medieve, pas raportimeve për Faton Hajrizin, i cili u arratis nga burgu në Kosovë dhe për të cilin thuhet se është vrarë në Serbi.
Më të sulmuarit nga kërcënimet sipas reagimit të AGK-së, janë Ermal Panduri, autor i emisionit “Debat Plus” në RTV Dukagjini, dhe Vehbi Kajtazi, udhëheqës i portalit Paparaci dhe panelist në Klan Kosova.
Po ashtu, në shënjestër me mesazhe fyese dhe kërcënuese janë vënë edhe Doruntina Bylykbashi e TV Dukagjini dhe Jehona Bajrami e Klan Kosova.
Videot përmbajnë përshkrimin “Vrasësit e Faton Hajrizit” dhe i akuzojnë mediat dhe gazetarët se kanë kontribuar në ngjarjet që çuan në vrasjen e Hajrizit në Serbi.
“Këto akuza, përveçse të pabaza, janë shumë të rrezikshme dhe vënë seriozisht në rrezik sigurinë e gazetarëve dhe familjeve të tyre”, thuhet nga ana e AGK-së.
AGK-ja u bën thirrje kolegëve gazetarë që të denoncojnë individët dhe llogaritë prej nga vijnë kërcënimet, dhe kërkon nga Policia e Kosovës të aktivizojë Njësitin e Krimeve Kibernetike për të identifikuar dhe mbajtur përgjegjës ata që kërcënojnë.
Meqë shumë prej kërcënimeve vijnë nga jashtë Kosovës, AGK-ja pret që autoritetet e sigurisë të bashkëpunojnë me partnerët e tyre ndërkombëtarë për të zbuluar autorët e kërcënimeve ndaj gazetarëve.