Deputeti i Aleancës për Ardhmërinë e Kosovës (AAK), Besnik Tahiri, ka akuzuar Qeverinë e Kosovës për shkelje të Ligjit për Paga në sektorin publik.
Në një postim në Facebook, Tahiri ka theksuar kaosin që, sipas tij, është krijuar në administratën e shtetit për shkak të këtyre shkeljeve.
Tahiri ka thënë se Gjykata Kushtetuese ka konstatuar disa shkelje të rëndësishme nga ana e Qeverisë.
“Shkeli parimin e sigurisë juridike të punonjësve. Shkeli parimin e barazisë para ligjit duke parashikuar paga dhe kompensime të ndryshme për punë dhe përgjegjësi të ngjashme. Shkeli të drejtën për t’u konsultuar të atyre që preken nga ligji, duke shkelur edhe kërkesat sindikale. E gjithë procedura u zhvillua pa asnjë konsideratë për aspektin dhe kapacitetin financiar e buxhetor, dhe pa asnjë referencë ndaj ligjeve të tjera. Shkeli të drejtën e klasifikimit të pagës si e drejtë pronësore e subjekteve punëmarrëse, e jo si pronë e qeverisë. Duke shkelur të drejtën e pronës, qeveria shkeli parimin se prona mund të preket vetëm në rrethana legjitime dhe të jashtëzakonshme”, ka shkruar ai në Facebook.
Në postimin e tij, Tahiri ka theksuar se, edhe pse kanë kaluar mbi gjashtë muaj që nga vendimi i Gjykatës Kushtetuese për korrigjimin e këtyre shkeljeve, Qeveria ka vazhduar të injorojë këto rekomandime dhe të afirmojë shkeljet e saj.
Sipas Tahirit, ky pasivitet tregon se Qeveria nuk ka interes të adresojë problemet në sektorin publik, përderisa nuk sheh mundësi për ndëshkime ose penalizime.