Prokuroria Themelore në Prishtinë ka kërkuar caktimin e masës së paraburgimit nga Gjykata e Prishtinës ndaj pesë të dyshuarve të përfshirë në vrasjen e së dielës në Aktash ku humbi jetën një person e pesë u plagosën.
Këtë e ka bërë të ditur për Dukagjinin, Prokuroria Themelore në Prishtinë.
“Ju njoftojmë se Prokurori i Shtetit pranë Gjykatës Kompetente ka kërkuar masën e paraburgimit ndaj pesë të pandehurve, të ndaluar me vendim të prokurorit për rastin e ndodhur në rrugën “Gazmend Zajmi” në Prishtinë”, thuhet në përgjigjen e prokurorisë.
Ndryshe, dje, Prokuroria Themelore në Prishtinë njoftoi se incidenti me armë zjarri në mes të disa personave në Aktash është iniciuar si “vrasje e rëndë” dhe “mbajtje në pronësi, kontroll ose posedim i paautorizuar i armëve”.
Në njoftim u tha se janë ndaluar pesë persona për këtë rast, derisa trupi i personit të vrarë është dërguar në Institutin e Mjekësisë Ligjore (IML) për autopsi.
Prokuroria tha se grupet kanë pasur mosmarrëveshje të mëhershme.
LEXO EDHE: Skena e krimit, mbi 100 plumba gjuajtën grupet “Capat” dhe “Sekiraqët”