Ministri i Punëve të Jashtme të Turqisë, Hakan Fidan, do të qëndrojë këtë të premte në Kosovë, ku do të diskutojë marrëdhëniet bilaterale dhe zhvillimet rajonale e ndërkombëtare.
Ai do të takohet me zëvendëskryeministren dhe ministren e Punëve të Jashtme, Donika Gërvalla, si dhe me komunitetin turk në Prizren e Mamushë.
Vizita e tij përfshin gjithashtu takime me përfaqësuesit e KFOR-it.
Kujtojmë se vizita e ministrit Fidan vjen pas arrestimit të kosovarit Liridon Rexhepi në Turqi, si i dyshuar për lidhje me Mossadin.
Një ditë më parë në Shkup, Fidan ka theksuar se dhuna nuk duhet të jetë opsion për zgjidhjen e çështjes Kosovë-Serbi, duke deklaruar se stabiliteti në Ballkan mbetet prioritet për Turqinë.
Ai ka deklaruar se vendosja e stabilitetit, paqes dhe prosperitetit në gjithë Ballkanin është prioriteti kryesor i Turqisë sot.
Këto komente, Fidan i bëri në konferencën e përbashkët për shtyp të mbajtur pas takimit të tij me ministrin e Punëve të Jashtme dhe Tregtisë së Jashtme të Maqedonisë së Veriut, Timço Mucunski, në Shkup.