Presidentja e vendit, Vjosa Osmani është takuar me Kardinalin Parolin, Sekretarin e Shtetit të Selisë së Shenjtë, gjatë javës së kaluar në New York.
Zyra e Presidentes ka njoftuar se Osmani ka shprehur përkushtimin e Kosovës për forcimin e marrëdhënieve dypalëshe me Selinë e Shenjtë.
“Ajo theksoi gjithashtu punën intensive me institucionet e Selisë së Shenjtë për hapjen e Misionit të Veçantë të Kosovës pranë Selisë së Shenjtë, duke e konsideruar këtë si një shembull të përkushtimit të Kosovës për forcimin e mëtejshëm të raporteve midis dy vendeve, si dhe për frymën e harmonisë ndërfetare që vendi ynë e mishëron me shekuj”, thuhet në njoftimin e Presidencës.
Osmani ka theksuar edhe rëndësinë e njohjes nga Selia e Shenjtë, si hap të rëndësishëm drejt thellimit të raporteve ndërshtetërore, e cila po ashtu do të kontribuonte drejt paqes dhe stabilitetit afatgjatë në rajonin tonë.
Në takim me Kardinalin Parolin, Osmani ka disktuar edhe ftesën për vizitën e Papës Françesku në Republikën e Kosovës të cilën e ka diskutuar në takim me Papën vitin e kaluar.