Kryetari i Partisë Demokratike të Kosovës (PDK), Memli Krasniqi, ka shprehur ngushëllime për familjen Thaçi pas ndarjes nga jeta të Haxhi Thaçit, babait të ish-presidentit Hashim Thaçi.
Krasniqi, bashkë me zyrtarë të lartë të PDK-së, kanë shkuar për ngushëllime në Burojë.
Gjatë vizitës në familjen Thaçi në Burojë, Krasniqi e vlerësoi të ndjerin duke thënë se ishte shqiptar i vërtetë me vlera të larta.
“I shprehëm ngushëllimet tona më të sinqerta familjes Thaçi… Baci Haxhi ka qenë një njeri me një karakter epik, siç e kemi mësuar edhe në të kaluarën në traditën tonë, ata shqiptarët e mirë të vërtetë, që ka ditur të edukojë jo vetëm familjen e tij, por të gjithë verzat”, ka thënë Krasniqi para mediave.
Ai ka shtuar se humbja e Haxhi Thaçit është edhe më e rëndë për shkak të mungesës së ish-presidentit Hashim Thaçi.
“Na vjen keq se kjo është një vdekje që bëhet edhe më e rëndë për shkakun e mungesës së presidentit Thaçi. Së paku ai pati mundësi që ta takojë për herë të fundit babanë e tij. Por, vërtetë kjo dhimbje shkon e rritet për familjen, për neve të gjithëve për shkakun e mungesës së presidentit Thaçi. Kujtimi për bacin Haxhi do të jetë i përhershëm e ne urojmë që ai të prehet ne paqe në dheun e Kosovës”, ka deklaruar Krasniqi para mediave.
Në pritjen e ngushëllimeve në Burojë është djali i ish-presidentit, Endrit Thaçi, ndërsa anëtarë të PDK-së i janë bashkuar ngushëllimeve për familjen.