Gjuha ishte aq e ashpër ndaj gazetarëve sa Prokuroria Themelore në Prishtinë dha urdhër që Sami Kurteshi, anëtar i Vetëvendosjes në KQZ të intervistohet nga Policia e Kosovës.
Ndonëse nuk ka vendim të lëshuar nga organet e drejtësisë për këtë situatë, një nen i Ligjit për Zgjedhje të Përgjithshme jep hapësirë që të merren veprime ndaj këtij anëtari të KQZ-së.
Me ndryshimin e ligjit, rekomandimi për shkarkimin e një anëtari bëhet nga vet KQZ-ja, edhe duke e votuar pastaj të njëjtin.
Ky propozim sipas ligjit duhet pastaj t’i dërgohet Presidencës së Kosovës.
Institucioni në fjalë ia ka konfirmuar Dukagjinit se një rekomandim i tillë nuk ka shkuar akoma në adresë të tyre.
“Deri më tani, një propozim i tillë nuk është adresuar nga ana e KQZ-së në Presidencë. Anëtarët e KQZ-së, përgjatë gjithë procesit zgjedhor dhe në çdo situatë që ndërlidhet me të, duhet ta respektojnë betimin që japin kur dekretohen në këtë institucion”, ka thënë Bekim Kupina – Presidenca e Kosovës.
Gjithsesi, Vullnet Bugaqku nga Instituti Demokratik i Kosovës po thotë se pika e këtij ligji që flet për integritetin e KQZ-së është e mangët.
“Kur kemi shkelje të integritetit të sjelljës së anëtarit të KQZ-së vetëm theksohet fakti që mund të propozohet, pra bëhet me anë të një propozimi por nuk ceket se kush e bën propozimin, a duhet të bëhet me 2 të tretën e anëtarëve të KQZ-së apo mjafton që një anëtar i KQZ-së ta propozoj shkarkimin e një anëtari tjetër dhe pastaj të votohet për apo kundër shkarkimit të këtij anëtari”, ka thënë Vullnet Bugaqku – KDI.
Ndërsa, ish-kryetari i KQZ-së, Mazllum Beraliu po thotë se specifikat e Ligjit për Zgjedhjet e Përgjithshme nuk ndërlidhen me sjelljet e Sami Kurteshit.
“kompetencën e ka organi ndjekës që të hetoj e të vërtetoj nëse janë përmbushur elementet e ndonjë vepre tjetër penale ose edhe në dispozitat e ligjit për zgjedhjet e përgjithshme që nuk kanë të bjënë drejtpërdrejt me këtë sjellje pa dashur të thellohem në interpretim”, ka thënë Mazllum Beraliu – Ish-kryetar i KQZ-së.
Anëtarë të Komisionit Qendror të Zgjedhjeve, në kushte anonimiteti i kanë thënë Dukagjinit se deri tani nuk ka pasur as iniciativë për të diskutuar për këtë çështje e aq më pak për të dërguar tek Presidentja një rekomandim të tillë.