Një person është arrestuar të hënën e 27 qershorit, i cili dyshohet për krime lufte në Kosovë.
Kështu ka bërë të ditur Prokuroria Speciale e Kosovës përmes një komunikate për media, ku theksohet se personi i arrestuar është shtetasi M.D. nga fshati Vitomiricë, komuna e Pejës, i nacionalitetit malazez, shtetas i Republikës së Kosovës.
“Arrestohet për shkak të dyshimit të bazuar se ka kryer veprën penale Krim i luftës kundër popullsisë civile, e sanksionuar me nenin 142 lidhur me nenin 22 të Ligjit Penal të Republikës Socialiste Federative të Jugosllavisë ( tutje “LP-RSFJ”), si ligj në fuqi në kohën e kryerjes së veprës penale, aktualisht i sanksionuar sipas veprës penale Krime lufte në shkelje të rëndë të nenit 3 të përbashkët për konventat e Gjenevës, e sanksionuar me nenin 146 lidhur me nenin 31 të Kodit Nr. 06/L-074 Penal të Republikës së Kosovës”, thuhet në njoftim.
Sipas njoftimit thuhet se rasti ka të bëjë me ofensivën e forcave ushtarake, policore dhe paramilitare serbe të datës shtatë maj të vitit 1999 në regjionin e Pejës, ku dyshohet se u vranë nëntë civilë të nacionalitetit shqiptar dhe janë zhdukur pesë persona të tjerë po ashtu civilë shqiptarë.
Me urdhër të Prokurorit të Shtetit, i pandehuri gjendet nën masën e arrestit dhe ndalimit policor, për t’u dërguar para Gjyqtarit të Procedurës Paraprake, brenda afatit ligjor.