Presidentja e Kosovës, Vjosa Osmani, ka reaguar pas goditjes së një qendre tregtare me raketë, në qytetin Kremenchuk në rajonin Poltava të Ukrainës.
Ajo e ka dënuar sulmin e fundit rus, duke shkruar se ky veprim i presidentit rus, Vladimir Putin mbi një mijë civilë të pafajshëm në Kremenchuk është i egër dhe thellësisht çnjerëzor.
“Sulmi i fundit i Putinit mbi një mijë civilë të pafajshëm në Kremenchuk është i egër dhe thellësisht çnjerëzor. Ky është një akt terrori dhe një vazhdimësi e krimeve sistematike të luftës kundër civilëve. Zemrat tona janë për popullin e Ukrainës. Ne do të qëndrojmë gjithmonë me ta”, ka shkruar ajo në Twitter.
Putin’s latest attack on a thousand innocent civilians in Kremenchuk is outrageous and profoundly inhumane.
This is an act of terror and a continuation of systematic war crimes against civilians.
Our hearts go out to the people of Ukraine. We will always stand with them.
— Vjosa Osmani (@VjosaOsmaniPRKS) June 27, 2022
Kryetari i bashkisë së qytetit, Vitaliy Meletskiy, me anë të një postimi në Facebook ka shkruar se raketa ka goditur ndërkohë që qendra ishte e mbushur me njerëz.
“Sulmi me raketa në Kremenchuk erdhi në një vend të mbushur me njerëz, i cili është 100% i parëndësishëm për luftimet. Ka të vdekur dhe të plagosur,” shkroi Maletskiy në Facebook.
Ndërsa, presidenti i Ukrainës, Volodymyr Zelensky, kishte njoftuar se raketa kishte goditur një qendër tregtare dhe publikoi një video të goditjes në Telegramin e tij.
“Okupatorët kanë goditur një qendër tregtare me mbi një mijë civilë brenda. Qendra tregtare nuk përbënte asnjë rrezik për ushtrinë ruse dhe nuk përbënte asnjë vlerë strategjike për ata. Qendra është duke u djegur dhe ekipet e shpëtimit po përpiqen ta shuajnë zjarrin. Numri i viktimave është i pamundur të imagjinohet. Nga pafuqia, Rusia vazhdon të godasë njerëzit e zakonshëm. Është e kotë të presësh të jenë e arsyeshëm apo njerëzorë”, shkroi presidenti ukrainas.
Shpërthime u dëgjuan edhe në Poltava, por aty nuk ka informacione për goditje me raketa.