Kryetari i LDK-së, Lumir Abdixhiku, është deklaruar pas letrës që i dërgoi kryeministri Albin Kurti me ftesën për koalicion qeverisës.
“E kam vlerësuar të pamundur bashkëpunimin me Lëvizjen Vetëvendosje,” u shpreh Abdixhiku para mediave.
Ai ka theksuar se për të dalë nga bllokada aktuale politike, LDK-ja propozon nisjen e një procesi të ri politik, fillimisht me takime konstative mes të gjitha partive shqiptare në vend.
“LDK-ja duke parë stagnimin 4-vjeçar, e kam fjalën për aleancat e rrezikuara, rrezikimin e sigurisë nacionale… E kam vlerësuar të pamundur bashkëpunimin me Lëvizjen Vetëvendosje. Por sot vendi është në krizë të thellë institucionale. Dhe zgjidhjen nga kjo bllokadë LDK-ja e konsideron të domosdoshme. Propozojmë nisjen e një procesi të ri politik, fillimisht konstativ me të gjitha partitë politike shqiptare. Në përputhshmëri me këtë LDK-ja propozon nisjen e këtij procesi me të gjitha partitë për nisjen e një qeverie nacionale te tranzicionit”, ka deklaruar ai.
Ai ka potencuar se nuk sheh arsye për t’u takuar me Kurtin, pasi që, sipas tij, qëndrimi i LDK-së tashmë i është përcjellë përmes një letre.
Por, kreu i LDK-së ka thënë se është i gatshëm për takime me liderë partiakë në momentin e parë që ata duan.
“Le të nisim një proces që nis zhbllokimin e procesit brenda një afati të shkurtër. Duhet një kryeministër unifikues, me një kabinet ministrash unifikues”, ka thënë Abdixhiku.
Ai i ka ftuar të gjitha partitë që të jenë bashkë për të ofruar zgjidhje.