Gjykata Themelore në Prishtinë ka shpallur fajtor Aleksandër Vllajiqin për veprat penale “spiunazh” dhe “mbajtje në pronësi, kontroll ose posedim i paautorizuar i armëve”, duke e dënuar me 5 vjet burgim dhe gjobë në shumën prej 1 mijë eurosh.
Dënimi u shqiptua pasi Vllajiq pranoi fajësinë në një marrëveshje me Prokurorinë Speciale të Kosovës, e cila u shqyrtua dhe u aprovua në seancën e mbajtur të enjten.
Sipas Prokurorisë, nga një datë e pacaktuar deri në arrestimin më 26 qershor 2024, Vlajiq ka vepruar si agjent i Agjencisë së Inteligjencës dhe Sigurisë së Serbisë, duke mbledhur dhe dërguar informacione që cenonin rendin kushtetues dhe sigurinë e Kosovës.
Po ashtu, ai akuzohej se kishte krijuar një rrjet informatorësh brenda organizatave ndërkombëtare në Kosovë, nga të cilët siguronte raporte dhe të dhëna që lidhen me çështje politike dhe të sigurisë në vend.
Vlajiq ishte njëri nga katër të akuzuarit për sulmin ndaj zyrave të Komisionit Komunal Zgjedhor në Mitrovicë të Veriut, në vitin 2022.