Gjykata Komerciale e Kosovës raportohet se ka pezulluar vendimin e Zyrës së Rregullatorit për Energji (ZRrE), që parashihte kalimin e bizneseve në tregun e lirë të energjisë elektrike.
Lajmin e ka bërë të ditur avokatja Blinera Osmani, e cila përmes një postimi në Facebook njoftoi se më 29 korrik 2025, Gjykata ka nxjerrë Aktgjykimin KA.nr.301/25, vendim ky që, sipas saj, ka pasoja të drejtpërdrejta dhe të menjëhershme në tregun energjetik të Kosovës.
Sipas Osmanit, Gjykata ka anuluar pikën IV të vendimit të ZRrE-së nr.275/24 të datës 5 prill 2024, ka anuluar tërësisht njoftimin e ZRrE-së të datës 12 mars 2025 për daljen në tregun e lirë, duke e cilësuar të kundërligjshëm, ka ezulluar zbatimin e këtyre vendimeve deri në një aktgjykim përfundimtar.
“Vendimi është i zbatueshëm menjëherë dhe prodhon efekt të drejtpërdrejtë juridik,” ka shkruar Osmani.
Ajo shton se të gjithë konsumatorët biznesorë të prekur nga vendimi duhet të kthehen menjëherë në tregun universal, ku u garantohet furnizim i sigurt dhe tarifa të rregulluara, sikurse para datës 1 qershor 2025 – kur kishte hyrë në fuqi liberalizimi i tregut.
“U bëjmë thirrje ZRrE-së dhe të gjithë operatorëve të tregut të energjisë që të respektojnë dhe zbatojnë pa vonesë këtë vendim gjyqësor,” thekson avokatja.