Në selinë e Kombeve të Bashkuara në Nju Jork po mbahet një takim urgjent i Këshillit të Sigurimit të OKB-së lidhur me përkeqësimin e situatës në Lindjen e Mesme.
Sekretari i Përgjithshëm i Kombeve të Bashkuara, António Guterres, e ka përshkruar situatën aktuale në Lindjen e Mesme si një “përshkallëzim të rrezikshëm” që po ndikon drejtpërdrejt mbi dy milionë civilë të bllokuar në enklavë, si dhe mbi pengjet izraelite që ende mbahen robër.
Netanyahu mbron sulmin e ri ushtarak në Gaza
Kryeministri izraelit Benjamin Netanyahu e ka mbrojtur planin e tij për të pushtuar Qytetin e Gazës , zonën më të madhe metropolitane në territorin palestinez , duke thënë se kjo është “mënyra më e mirë për t’i dhënë fund luftës… shpejt”.
Ai tha se ofensiva e re planifikon të godasë dy bastione të mbetura të Hamasit përreth qytetit.
Netanyahu tha në një konferencë për shtyp të dielën se, duke pasur parasysh refuzimin e Hamasit për të dorëzuar armët, Izraeli nuk ka zgjidhje tjetër veçse të “përfundojë punën” dhe të “mposhtë” grupin militant.
Netanyahu tha se Izraeli kishte lejuar 2 milionë ton ndihma në enklavë që nga fillimi i luftës.
Ai tha se qeveria do të hapë “korridore të sigurta” për shpërndarjen e furnizimeve thelbësore, si dhe vende të reja ndihme në Gaza.
OKB-ja, agjencitë e ndihmës dhe disa qeveri i kanë kërkuar Izraelit javët e fundit të rrisë furnizimet me ushqim, karburant dhe ilaçe për banorët e Gazës për shkak të frikës nga uria.
Kryeministri tha gjithashtu se i kishte udhëzuar ushtrinë që të lejonte më shumë gazetarë të huaj të raportonin nga Gaza, pasi i kishte ndaluar deri më tani.