Vladimir Putin ka rënë dakord të zhvillojë bisedime ballë për ballë me Volodymyr Zelensky për të diskutuar një marrëveshje paqeje në Ukrainë, sipas Donald Trump dhe udhëheqësve evropianë, megjithëse Moska nuk e ka konfirmuar një gjë të tillë.
Sipas mediave të huaja, përcjell Telegrafi, ky zhvillim erdhi pas një dite diplomacie të tensionuar në Shtëpinë e Bardhë, në të cilën Trump përjashtoi mundësinë e një armëpushimi, ndërsa Zelensky dhe aleatët e tij shtynë përpara garancitë e sigurisë të mbështetura nga SHBA-të si pjesë e çdo marrëveshjeje afatgjatë.
Presidenti ukrainas tha se pas bisedimeve, garancitë e sigurisë për Kievin do të “formalizoheshin” brenda 10 ditësh.
“Në përfundim të takimeve, e thirra presidentin (Vladimir) Putin dhe fillova përgatitjet për një takim, në një vend që do të përcaktohet, midis presidentit Putin dhe presidentit Zelensky”, shkroi Trump në platformën e tij Truth Social, duke shtuar se do të pasonte një takim trepalësh që përfshinte presidentin amerikan.
Kryeministri britanik Keir Starmer dhe kancelari gjerman Friedrich Merz u shfaqën për të konfirmuar takimin.
Merz u tha gazetarëve: “Presidenti amerikan foli me presidentin rus në telefon dhe ranë dakord që do të kishte një takim midis presidentit rus dhe presidentit ukrainas brenda dy javëve të ardhshme”.
Por kancelari paralajmëroi: “Nuk e dimë nëse presidenti rus do të ketë guximin të marrë pjesë në një samit të tillë. Prandaj, nevojitet bindje”.
Putin, nga ana e tij, tha se ishte i hapur për “idenë” e bisedimeve të drejtpërdrejta me Ukrainën, ndërsa foli në telefon me Trump, sipas agjencisë së lajmeve Tass të Rusisë, por nuk kishte konfirmim se takimi do të zhvillohej.
Më parë, Zelensky tha se Ukraina ishte gati të takohej me Rusinë në “çdo format” dhe se çështjet territoriale do të diskutoheshin në nivel dypalësh me presidentin rus.
Takimi i së hënës erdhi pasi Trump u takua me Putinin në Alaska dhe tha se përgjegjësia tani do të ishte mbi Zelenskyn për të rënë dakord për lëshimet që ai tha se mund t’i jepnin fund luftës.
Trump, i cili vetëm javën e kaluar paralajmëroi Rusinë për “pasoja shumë të rënda” nëse Putini nuk do të binte dakord për ndalimin e luftimeve, e bëri të qartë se e kishte ndryshuar qëndrimin e tij.
Ndërkohë, pas takimit me udhëheqësit e Gjermanisë, Britanisë, Francës, Italisë, Finlandës, Bashkimit Evropian dhe NATO-s, Trump shkroi në platformën e tij Truth Social se kishte pasur diskutime për garancitë e sigurisë dhe “cilat garanci do të ofroheshin nga vendet evropiane, me një koordinim me Shtetet e Bashkuara të Amerikës”.
Dhe presidenti francez Emmanuel Macron tha se bisedimet nuk përfshinin dorëzimin e territorit nga Kievi te Rusia.