Ish-kryeministri i Kosovës dhe deputeti i LDK-së, Avdullah Hoti, ka reaguar pas përjashtimit të gjashtë gazetarëve nga moderimi i emisioneve në RTK.
Në një postim në Facebook, Hoti ka thënë se stafi i RTK-së është lënë edhe pa paga, ndonëse sipas tij kjo situatë mund të zgjidhej lehtësisht pa u dëmtuar buxheti i planifikuar për transmetuesin publik.
“Tash i censurojnë gazetarët që e kritikojnë pushtetin, ndërkaq i favorizojnë ata që i miklojnë ministrat në intervista. Kjo qasje është e papranueshme, është kundër parimeve të funksionimit të mediumit publik të pavarur. Kjo praktikë zbatohet vetëm në mediumet publike të regjimeve jodemokratike”, ka shkruar Hoti.
Ai ka theksuar se zyrtarët e lartë të RTK-së që po marrin këto vendime e dinë se janë duke bërë shkelje ligjore.
“Çfarë zori kanë që lejojnë të instrumentalizohen në këtë mënyrë nga pushteti, do ta marrim vesh me kohë. Por ligjit nuk i shpëtojnë, sado me vonesë. Lista është bërë e gjatë e atyre që do të mbajnë përgjegjësi për këto shkelje”, ka përfunduar Hoti.