Kancelari gjerman, Friedrich Merz, deklaroi më 29 gusht se lufta e Rusisë kundër Ukrainës mund të vazhdojë edhe për “muaj të tërë”, pavarësisht përpjekjeve të fundit të udhëhequra nga Shtetet e Bashkuara për t’i dhënë fund konfliktit.
Duke folur në Francë së bashku me presidentin francez, Emmanuel Macron, Merz tha se nuk ka “iluzione” për një përfundim të shpejtë të luftës dhe u zotua se “ne nuk do ta braktisim Ukrainën”.
Ai theksoi se nuk ishte i befasuar nga vonesat e Kremlinit në lidhje me përpjekjet e presidentit amerikan, Donald Trump, për të organizuar një takim të drejtpërdrejtë mes presidentit rus, Vladimir Putin, dhe atij ukrainas, Volodymyr Zelensky.
“Ajo është pjesë e strategjisë së presidentit rus”, tha Merz, duke shtuar se Putin ka vendosur kushte paraprake “krejtësisht të papranueshme” për një takim me Zelenskyn.
Kancelari gjerman theksoi se mbajtja e aleatëve të Ukrainës të bashkuar në të ashtuquajturën “koalicion të vullnetit” është një nga detyrat më urgjente të momentit.
Më 15 gusht, presidenti Trump zhvilloi një samit me Putinin në Alaskë dhe më pas priti në Shtëpinë e Bardhë presidentin Zelensky dhe liderë evropianë.
Trump ka vendosur një afat dyjavor për të parë se si do të sillen palët, pas së cilit pritet të marrë një vendim mbi hapat e ardhshëm.