Agjencia e Menaxhimit Emergjent (AME) ka njoftuar se të dielën në Kosovë janë regjistruar gjithsej 36 vatra zjarri.
Sipas njoftimit, 32 prej tyre janë lokalizuar, ndërsa 4 vatra mbesin ende aktive.
“Gjatë ditës së sotme në nivel vendi janë regjistruar gjithsej 36 vatra zjarri. Nga to, 4 vazhdojnë të jenë aktive, ndërsa 32 janë lokalizuar falë ndërhyrjes së Njësive Profesionale të Zjarrfikjes dhe Shpëtimit”, thuhet në komunikatën e AME-së.
Agjencia u ka bërë thirrje qytetarëve që të shmangin çdo veprim që mund të shkaktojë zjarr, të denoncojnë pranë organeve ligjzbatuese rastet e zjarrvënies së qëllimshme dhe të raportojnë urgjencat në numrat 112, 193 dhe 192.
AME ka falënderuar zjarrfikësit dhe Qendrat Operative 112 për përkushtimin dhe punën e tyre të vazhdueshme.