Mijëra shoferë kamionësh në Bosnje kanë ndalur dërgesat e mallrave në të gjithë vendin të hënën, më 1 shtator, duke paralajmëruar se do të vazhdojnë bllokimin derisa kërkesat e tyre për kushte më fleksibile udhëtimi dhe mbështetje më të madhe brenda Bashkimit Evropian të plotësohen.
Rreth 6.000 shoferë kanë ndërprerë pothuajse krejtësisht transportin e mallrave, duke shkaktuar kolona të gjata dhe pengesa në trafik. Ata kërkojnë përmirësim të kushteve të punës në tregun kryesor të eksportit të Bosnjës – Bashkimin Evropian, i cili sipas të dhënave zyrtare vitin e kaluar përbënte rreth 64% të tregtisë së huaj të vendit. Për më tepër, mbi 90% e mallrave transportohen përmes rrugëve.
“Ne kemi ndaluar zinxhirët tanë të furnizimit përmes Bosnje e Hercegovinës”, tha Velibor Peuliq nga asociacioni kryesor i shoferëve të kamionëve, Konzorcijum logistika BiH. Ai shtoi se vetëm në Sarajevë nuk janë lejuar të arrijnë rreth 4 mijë tonë mallra.
Ky sektor, ku punojnë midis 15 deri në 18 mijë shoferë, ka muaj të tërë që kërkon nga autoritetet bisedime me BE-në për ndryshimin e një rregulli që ata e konsiderojnë diskriminues. Fjala është për kufizimin e qëndrimit në BE në 90 ditë brenda një periudhe 180-ditore – njësoj si për turistët. Ky rregull është në fuqi që nga viti 2008, kur Bosnja nënshkroi marrëveshjen tregtare me BE-në.
Shoferët kërkojnë përjashtim nga ky kufizim ose që llogaritja të bëhet në orë dhe jo në ditë. “Pasi zinxhirët e furnizimit të ndalen, kjo do të shihet në çdo qytet… Shpresojmë që ministritë të fillojnë të bëjnë punën e tyre që nga sot”, theksoi Peuliq.
Sipas klubit automobilistik BIHAMK, rreth 10 pika kufitare janë bllokuar nga kamionët, kryesisht në kufi me Kroacinë. Edhe pse qëllimi i protestës nuk ishte pengimi i qarkullimit rrugor, veprimi ka shkaktuar vonesa të mëdha në disa qytete, përfshirë edhe Sarajevën.