Presidenti i Ukrainës, Volodymyr Zelensky, ka njoftuar se një person është arrestuar si i dyshuar për vrasjen e ish-kryetarit të Parlamentit, Andriy Parubiy.
Parubiy u qëllua për vdekje me armë zjarri më 30 gusht, në rrugën Jefremova të qytetit perëndimor të Lvivit, pranë banesës së tij. Autoritetet e zbatimit të ligjit thanë se 54-vjeçari ndërroi jetë menjëherë nga plagët e marra.
“Ministri i Brendshëm, Ihor Klymenko, dhe kreu i Shërbimit të Sigurisë së Ukrainës, Vasyl Maliuk, më raportuan për arrestimin e një të dyshuari për vrasjen e Andriy Parubiyt”, shkroi Zelensky në platformën X më 31 gusht. Ai theksoi se hetimet janë në zhvillim e sipër dhe ka urdhëruar që çdo informacion i disponueshëm të bëhet publik.
“Faleminderit oficerëve tanë për reagimin e shpejtë dhe të koordinuar. Të gjitha rrethanat e kësaj vrasjeje të tmerrshme duhet të sqarohen”, shtoi presidenti.
Prokuroria e Përgjithshme e Ukrainës ka hapur procedurë për “vrasje me paramendim”, ndërsa fillimisht sulmuesi ishte shpallur në kërkim. Disa nga bashkëpunëtorët e Parubiyt kanë akuzuar Rusinë për vrasjen. Deputeti Mykola Knyazhytskiy deklaroi se kjo ishte “hakmarrje e Rusisë për qëndrimet e tij”, duke nënvizuar se Parubiy u bë objektiv për shkak të mbështetjes së fortë ndaj sovranitetit dhe unitetit të Ukrainës përballë pushtimit rus.
Andriy Parubiy njihet për rolin e tij të rëndësishëm në protestat e Maidanit gjatë viteve 2013–2014, të njohura si Revolucioni i Dinjitetit, i cili solli rrëzimin dhe largimin nga pushteti të presidentit të atëhershëm, Viktor Yanukovych, pas vendimit të tij për ta larguar Ukrainën nga rruga e integrimit evropian dhe për t’u afruar me Rusinë.