Instituti Kombëtar i Shëndetësisë Publike të Kosovës (IKSHPK) dhe Kompania Rajonale e Ujësjellësit “Prishtina” kanë njoftuar se qytetarët në disa zona të Prishtinës dhe Graçanicës nuk duhet të përdorin ujin e pijshëm, për shkak të rritjes së përqendrimit të manganit në rrjetin shpërndarës që furnizohet nga liqeni akumulues i Badocit.
Zonat e prekura janë: Graçanica dhe fshatrat përreth, Hajvalia, Veterniku, Lagjja 038, Lagjja Qëndresa, Qëndresa Home, Swiss Village, Preoci, Çagllavica, rrugët Behar Begolli, Richard Holbrooke, Shkupi, Holger Petersen, Malush Kosova, Lagjja Qershia, Lagjja NIC, Matiçani (drejtimi nga Pallati i Drejtësisë), fshati ndërkombëtar, rruga Muharrem Fejza, rruga Enver Maloku, Lagjja Kodrina, objektet Tregtia, Iliria Building, Standardi, si dhe zona të tjera si Bregu i Diellit (qendra dhe afër Albi Mall), shkolla “Ismail Qemali”, rrugët Mehmet Gradica, Hyzri Talla, Qamil Bala dhe pjesa “te Xhambazët”.
Sipas analizave laboratorike, niveli i manganit në ujin e liqenit Badoc ka kaluar kufijtë teknikë të cilësisë së ujit për konsum, megjithëse nuk ka arritur në nivel të rrezikshëm për shëndetin.
Autoritetet theksojnë se vlimi i ujit nuk e eliminon manganin, pasi bëhet fjalë për ndotje kimike. Uji mund të përdoret vetëm për pastrim, higjienë personale dhe mirëmbajtje të ambientit, por jo për pije.
Qytetarët do të njoftohen më tej deri në zgjidhjen e problemit.