Shqipëria ka regjistruar një numër të lartë riatdhesimesh të shtetasve të saj nga vendet e Bashkimit Evropian dhe ato fqinje gjatë vitit 2024.
Sipas të dhënave nga Plani Kombëtar i Migracionit, vitin e kaluar në vend janë kthyer 7,901 persona, një rënie prej 4% krahasuar me vitin 2023, kur ishin regjistruar 8,220 të kthyer.
Kjo tendencë në ulje lidhet me ndryshimet në politikat migrimit të vendeve pritëse, forcimin e kontrolleve kufitare, si dhe me reduktimin e flukseve të migracionit nga Shqipëria drejt BE-së dhe zonës Schengen.
Një element i spikatur i riatdhesimeve është gjinia e të kthyerve.
Nga 7,901 shtetas të kthyer në 2024, 7,521 ishin meshkuj dhe vetëm 380 femra, çka përbën rreth 95% të totalit.
Nga ana tjetër, edhe kërkesat për azil nga shtetas shqiptarë kanë shënuar rënie. Sipas të dhënave të EUROSTAT-it, në vitin 2023 janë regjistruar 7,015 aplikime për azil në vendet e BE-së, shumë më pak se në vitin 2022 kur numri i aplikimeve arrinte në 10,745.
Kjo përbën një ulje prej rreth 35%, duke reflektuar një ndryshim gradual në dinamikën migratore të shqiptarëve.